Agwat ng 'rich' at pobre bumuka

(Noel Abuel)

Lalo pang lumayo ang agwat ng mahihirap at mayayamang pamilya sa bansa at itinuturong isa ito sa dahilan ng lumalawak na kahirapan sa bansa.

Ito ang iniulat kahapon ng National Statistics Office (NSO) base sa isinagawang 2006 Family Income and Expenditures Survey (FIES).
Lumitaw sa pananaliksik na ang 10% ng populas­yon na binubuo ng pinakamayayamang pamilya sa Pilipinas ang kumakabig ng 1/3 ng kabuuang kita o income ng bansa.

Ayon sa survey, ang pinakamayayamang 1.74 milyong pamilya ay kumita ng 36% ng buong 2006 family income o mahigit P3 trilyon.

Nasilip din sa pana­naliksik na ang mahihirap na pamilya ay kumikita lamang ng average income na P32,000 kada taon habang ang mayayamang pamilya ay kumikita ng average income na P617,000 o 19.2 ulit na mas malaki sa kita ng mahihirap.