Nakakalungkot ang naging pasya ng isang batang babae na dahil sa kahirapan sa buhay ay nagpasya na lamang na magpakamatay sa pamamagitan ng pagpapatiwakal.

Ang 11-anyos na si Mariannet Amper, tubong Davao City, ay nag-suicide dahil sa labis na kahirapan. Karukhaan ang nagtulak sa biktima para tuldukan na lamang ang kanyang buhay.

Natagpuan mula sa higaan ng biktimang nasa ika-anim na baitang ang isang ‘diary’ at isang liham para kay Vicky Morales, ang host ng programa sa GMA Network na "Wish Ko Lang".

Sa kanyang sulat kamay ay hinihiling nitong magkaroon siya ng bagong sapatos, bag at hanapbuhay para sa kanyang jobless na tatay at sa nanay niyang paekstra-ekstra lang sa paglalabada.

Pangarap nitong makapagtapos sa pag-aaral at gustong makabili ng bagong bike para hindi na mamasahe pa at gawin na lamang itong ‘service’ sa pagpasok sa eskuwela. Ngunit dahil nga sa kasalatan sa buhay ay napilitan na lamang na kitilin ni Mariannet ang kanyang buhay.

Nakakalungkot isipin na sa murang edad ay mawalan na agad ng pag-asa ang gaya ni Mariannet. Nagkataon pang nagpakamatay ito sa ginaganap na food summit, sa pangunguna ni Pangulong Gloria Macapagal-Arroyo na ang layon ng pagpupulong ay maresolba ang kagutuman sa liblib na bahagi ng bansa.

Ilang beses na bang nangako ang ating Pangulo na reresolbahin ang kahirapan partikular na ang kagutuman?

Hindi nga ba’t sa pinakabagong survey ng Social Weather Station (SWS) ay lumitaw na lima sa bawat 10 pamilyang Filipino ang sumasala sa oras ng pagkain.

Sa kabuuan ay tinatayang 9 milyong pamilyang Pinoy ang naghihikahos at kapos sa pagkain sa araw-araw.

Ang masakit, sa halip na seryosohin at upuan ang inaamag nang problemang ito ay optimistiko pa ring nanindigan ang Palasyo na lowest rating pa rin ang average percentage rating ng pamahalaang Arroyo sa usaping self-rate poverty kumpara sa tatlo pang nagdaang pangulo. Pambihira!

Simple lang ang mga pangarap ni Mariannet pero naipagkakait dahil sa talamak na kurakutan ng pamahalaan gaya ng pagmumudmod ng salapi sa mga pulitiko bukod pa sa nakakahiyang issue na nangunguna ang mga Pinoy sa Southeast Asia, sa paglaklak ng mamahaling mga alak.