'P130-B kita ng gobyerno naibubulsa lang'

Umaabot ng P130 bilyon ang nawawalang kita ng gobyerno taon-taon dahil sa katiwalian, ayon mismo sa kalihim ng finance department.

Sa kalkula ni Secretary Gary Teves, nawala ito dahil sa smuggling sa Customs, hindi pagbibigay ng resibo at hindi pagbayad ng tamang buwis sa Bureau of Internal Revenue (BIR).

Pati miyembro ng Kamara ng mga Representante, umamin sa hearing nitong Martes na noong abogado pa siya, naranasan din niyang makipag-ayos para makaiwas magbayad ng tamang buwis ang kliyente niya.

“Ito iyung notebook, nandoon ang mga pangalan ng mga suki na hindi nila ini-examine, may monthly collection doon. Especially when you’re in private practice you play the game sometimes,” pahayag ni Camiguin Rep. Pedro Romualdo.

Pero mas nakakagulat ang panukala niyang bigyan na lang ng opisyal na komisyon o "cut" na "for the boys" ang ang mga tax collector at customs brokers para mabawasan ang pangungurakot.

"Lets be honest or half-honest and let's reverse the sharing,” sabi pa ni Romualdo.

Kontra ng Department of Finance, dapat patuloy na mahuli ang mga corrupt na opisyal sa tulong ng kanilang lifestyle checks at intelligence work imbis na suportahan ang panghihingi ng lagay para masupil ang tax leakage at para hindi masira ang plano na huwag nang magdagdag ng buwis at muling mangutang ang gobyerno sa darating na mga taon.