|
Iginawad na nga kahapon ni
Pangulong Gloria Macapagal-Arroyo ang executive clemency kay dating
Pangulong Joseph Estrada. Pangunahing konsiderasyon sa desisyon,
base sa binasang kautusan ng Pangulo, ay ang edad ni Estrada at ang
mahigit anim na taong pagkakabilanggo na nito.
Tulad ng ibinabang guilty
verdict noon ng Sandiganbayan sa plunder case ni Estrada, may natuwa
at may nainis sa paggagawad ng pardon sa dating pangulo.
Syempre, ang mga
loyalistang supporters ni Estrada na tinatawag na masang Pinoy ay
natutuwa at makakalaya na ang kanilang lider. Pero para sa mga
humihingi ng katarungan sa kasalanan ng pinatalsik na lider sa
bayan, isang lantarang paglalaro sa justice system sa Pilipinas ang
aksyon ni Arroyo. Muli ay inilutang ng mga kontra pardon ang
pagiging ‘unfair’ ng hustisya sa ‘malalaking tao’ at ordinaryong mga
convicts. Dahil nga dating pangulo, iba ang konsiderasyon at mabilis
ang pagpapatawad.
Kunsabagay ay inaasahan
naman na mayroong dalawang magkaibang reaksyon anuman ang maging
desisyon ng Pangulo sa hininging pardon ni Estrada.
Ngunit base na rin sa
nakakaraming opinyon, kung saan pati ang Simbahang Katoliko at
business sector ay nakiayon, tama at marapat nga raw na ilapat na
ang pardon kay Estrada.
Kahit nga naman sa mga
ordinaryong preso, kapag tumuntong na sa katandaan ay agad ding
ikinukonsidera ang pagkakaloob dito ng pardon.
At isa pang malaking
konsiderasyon din marahil ay itong patuloy na pagsama ng kondisyon
ng ina ng dating pangulo na si Doña Mary Ejercito. Tayong mga Pinoy
ay sadyang malambot ang puso sa ina, lalo na sa inang maysakit. Kung
humanitarian consideration ang pinag-ugatan ng isang pardon, sa
tingin namin ay bihira ang kokontra. Kaya nga lamang ay naikukumpara
ito sa kaso ng mga ordinaryong convicts. Kumbaga, nagkakaroon ng
double standard porke’t ex-president itong si Estrada.
Sa huli, nahihiling lang
namin na sana ay makatulong sa pagtatag ng sitwasyon ng bansa ang
pardon na ito kay Estrada. Ang tanging hangad lang naman natin ay
ang pangkalahatang kabutihan ng Pilipinas at ng buong sambayanan.
Kung mas makakabuti ang pardon hindi lang kay Estrada kundi sa
epekto nito sa ating kapayapaan at katatagan, nakasuporta kami
rito.
Ang tanong lang na naglalaro sa aming
isipan: ano naman kaya ang intensyon ng naggawad ng pardon na si
Pangulong Arroyo? Ito ba’y pagtatanim ng utang na loob bilang
paghahanda sa nalalapit niyang pagbaba sa puwesto? Dahil ba sa nais
din niyang tratuhin nang tulad ni Estrada oras na matulad siya sa
kapalaran ng huli? |