Suhulan, kalakaran sa gobyerno--Lozada

Dati nang sinasabi ni dating pangulong Joseph Estrada na 20 percent ang kickback o suhol sa bawat proyekto ng gobyerno.

Ngayon, pinatotohanan ito ng star witness ng Senado na si Rodolfo "Jun" Lozada Jr.

Sa ZTE deal nga daw, halos kalahati ang diumano’y kickback kaysa tunay na halaga ng proyekto

Ayon kay Lozada, US$130-million o halos P6.5 billion ang hinihinging komisyon ni dating Commission on Elections chairman Benjamin Abalos sa proyektong nagkakahalaga ng US$329 million o P16 billion.

Nang tanungin siya kung ano pa ang alam niyang proyekto diumano’y maanomalya, binanggit niya ang Southrail project na nagkakahalaga ng US$932 million o P23 billion.

Triple halos ng halaga ng naunsyaming ZTE deal.

“Katulad po nitong sa Southrail, mga 22%, moderate,” sabi ni Lozada.

Tulad ng ZTE, uutangin ang pondo sa Export-Import Bank of China.

Sabi ni Lozada na naging consultant ng proyekto, overprized ito ng US$70 million o halos P1.75 billion.

Dagdag ni Lozada, matagal na itong kalakaran sa gobyerno at sinisisi niya ito sa magulong sistema ng pangongontrata ng proyekto ng mga gobyerno.

"Institutionally, the procurement system of government doesn’t really work because they are being decided by people like us. Ang nakikita ko po dysfunction the due process of procurement is primarily geared towards tailoring the process to the sponsor," paliwanag ni Lozada.

Kinumpirma ng Makati Business Club ang kultura ng kickback sa mga proyekto ng gobyerno.

“Hindi lang malaki iyung bribe, hindi kailangan iyung project. Kaya iyung buong project mawawaldas,” sabi ni Bertie Lim, executive director ng Makati Business Club.

Dagdag pa ni Lim, sapul ang masa dahil imbes na sa kanila, sa katiwalian napupunta ang pera.

"Iyong mga basic services na para sa mga mahihirap, mga maralita. Sila ang napuwepuwera. Dapat sila ang nangunguna sa budget natin," sabi ni Lim.

Itinanggi naman ng Malacañang na kasama sa patakaran ng pamahalaan ang 20 percent kickback.

Pursigido pa nga raw si Pangulong Arroyo na tuluyang linisin ang katiwalian sa gobyerno.